Fl-okkażjoni ta’ Jum il-Mara:
Il-PL jtenni l-impenn tiegħu favur l-ugwaljanza
Fi stqarrija l-Kelliema Laburista għall-Familja u l-Ugwaljanza, id-Deputat Justyne Caruana, qalet li bħal-lum nisimgħu ħafna dwar suġġetti b’konnessjoni mad-drittijiet tan-nisa, iżda żgur li suġġett bħal dan m’għandux jingħata importanza f’din il-ġurnata biss imma għandu jkun mertu ta’ diskussjoni kontinwa.
Id-Deputata Justyne Caruana qalet li hemm bżonn li nindirizzaw il-ħafna problemi li jeżistu u li qegħdin ikunu kaġun ta’ sitwazzjonijiet diskriminatorji kontra n-nisa li fis-seklu 21 ċertament mhux aċċettabbli.
Għalkemm f’pajjiżna għandna l-protezzjoni legali kontra d-diskriminazzjoni, xorta waħda għandna ħafna minn dawn il-każi li sfortunatament qegħdin jibqgħu misturin minħabba biżà.
Id-Deputata Justyne Caruana qalet li hemm bżonn li nindirizzaw il-ħafna problemi li jeżistu u li qegħdin ikunu kaġun ta’ sitwazzjonijiet diskriminatorji kontra n-nisa li fis-seklu 21 ċertament mhux aċċettabbli.
Għalkemm f’pajjiżna għandna l-protezzjoni legali kontra d-diskriminazzjoni, xorta waħda għandna ħafna minn dawn il-każi li sfortunatament qegħdin jibqgħu misturin minħabba biżà.
lllum għandna liġi ċara li tipprovdi l-protezzjoni lill-vittma u saħansitra tiddelega lill-Kummissjoni għall-Promozzjoni tal-Ugwaljanza biex tkun l-istess kummissjoni li tressaq il-każ quddiem il-Qrati kompetenti. Però biex din il-liġi taħdem aħjar u biex il-vittma tħossha iktar protetta, hemm bżonn li din il-liġi tiġi riveduta u msaħħa. Minkejja li għandna nisa kapaċissimi xorta waħda fuq livelli internazzjonali, fil-‘gender equity index’, sena wara l-oħra Malta dejjem qiegħda taqa’ lura. Mir-rapport li toħroġ l-NCPE ta’ kull sena jirriżulta ukoll li minkejja l-isforzi kollha xorta waħda għad baqa’ l-ikbar ġlieda li hija dik tal-kultura u l-mentalità ta’ l-isterjotipi. Żgur li f’dan il-qasam l-edukaturi kollha f’pajjiżna għandhom rwol kruċjali ħafna u allura huwa importanti ferm li l-kurriklu jinkludi iktar edukazzjoni favur l-ugwaljanza. Dr Caruana qiegħda tħeġġeġ lill-Gvern biex jieħu pożizzjoni dwar il-proposta tal-Kummissjoni Ewropea dwar iż-żieda fil-‘maternity leave’ kif ukoll jiġu riveduti l-‘parental leave’ biex ikunu ta’ inċentiv biex iktar missierijiet jibqgħu d-dar jieħdu ħsieb it-tfal biex jagħtu ċans lill-mara tavvanza fil-karriera tagħha u ma titlifx opportunitajiet ta’ promozzjonijiet minħabba l-assenza tagħha minn fuq il-post tax-xogħol. Il-‘family friendly measures’ għandhom jissaħħu u għandu jimxi lejn iktar konverġenza bejn is-settur pubbliku u dak privat fejn dan tal-aħħar għandu jkun mgħejjun biex iktar ‘family friendly measures’ jiġu ntrodotti fuq il-postijiet tax-xogħol. Skont studji li saru, pożizzjoni ta’ inugwaljanza fil-familja jistgħu ukoll iwasslu għall-vjolenza domestika. Filwaqt li nesprimu s-solidarjetà tagħna mal-vittmi tal-vjolenza domestika, nagħmlu appell qawwi lil dawk kollha li fis-silenzju ta’ djarhom qegħdin isofru minn din il-pjaga biex jagħmlu l-kuraġġ u joħorġu minn dan iċ-ċirku vizzjuz, qalet id-Deputata Laburista Justyne Caruana. Fl-istess waqt, iżda inħeġġu lill-Gvern biex jinvesti iktar fl-entitajiet, għaqdiet u strutturi involuti f’dan il-qasam tant delikat biex il-vittmi jsibu l-għajnuna kollha li jeħtieġu u b’hekk iktar vittmi jagħmlu l-kuraġġ biex jitilqu mill-ambjent ta’ vjolenza li jkunu qegħdin jgħixu. B’hekk iserħu rashom li se jsibu kull għajnuna għalihom u għall-uliedhom biex jgħixu ħajja aħjar kif inhu xieraq. Fl-aħħarnett Justyne Caruana awgurat lin-nisa kollha ta’ pajjiżna li huma pilastru importanti u sod għas-soċjetà kollha u għall-pajjiż. |
©
2009 - Justyne Caruana